Հայաստանյայց Առաքելական Սուրբ Եկեղեցու Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախմբի եզրակացությամբ՝ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի հայրապետական տնօրինությամբ կարգալույծ է հռչակվել Թալինի տարածաշրջանի հոգևոր հովիվ Տ․Թադե քահանա Թախմազյանը։
Այս որոշումը կայացվել է մի շարք հիմնավորումների հիման վրա, որոնք առնչվում են եկեղեցական կարգապահական կանոնների խախտմանը։ Ըստ հանձնախմբի եզրակացության՝ Տ․Թադե քահանան իր գործողություններով վարկաբեկել է Հայ Եկեղեցին և եկեղեցականներին, այդ թվում՝ հրապարակային զրպարտիչ հայտարարություններ տարածելով։
Ավելի մանրամասն՝ նրա դեմ ներկայացված մեղադրանքներն են՝
Հակաեկեղեցական գործողություններ: Տ․Թադե քահանան մասնակցել է կարգալույծ հռչակված անձի մեղքին։
Նվիրապետական կարգի ժխտում: Նա կամայականորեն զեղչել է պատարագներին Ամենայն Հայոց Կաթողիկոսի և Թեմակալ առաջնորդի անունների հիշատակության հատվածը, ինչը փաստացիորեն ժխտում է նվիրապետական կարգը և դուրս է բերում նրան Եկեղեցուց՝ իրեն դրսևորելով հերձվածողական շարժման կողմնակից։
Եկեղեցական իշխանության նկատմամբ անհնազանդություն: Տ․Թադե քահանան դրսևորել է անհնազանդություն եկեղեցական իշխանության նկատմամբ։
Այս որոշման արդյունքում Տ․Թադե քահանան այսուհետ կդասվի աշխարհականների շարքին՝ Արամայիս Թախմազյան ավազանի անունով։
About the Author
